النهاردة نزلت عشان اعمل حاجات في الكود في مشروع التخرج كما هو الحال من حوالي اسبوعين فاتو
الاقي error اقوم احاول فيه وان معرفتش يبقي الحل هو الفانوس السحري "الباشمهندس" مين بقي الباشمهندس ؟ ده شاب محترم جدا كان بيدينا الكورس بتاع لغة البرمجة اياها (C#) اللي استمر من شهر اغسطس 2007 لغاية شهر ابريل 2008 يعني حوالي 8 شهور اه والله مش باكدب ، 8 شهور وهو مستحملنا اسئلة وغباء ووقت كتييييير وتاخير ودلع ونرفزة وتعب اعصاب وامتحانات وعاوزين الاسبوع اللي جاي اجازة عشان عندنا ميد ترم وعاوزين نمشي بدري عشان مش بنلاقي مواصلات وعاوزين برييك عشان تعبانين جداااا و.......... طلبات للصبح وكلها ليها نفس الرد (حاضر اوكي) وخلص الكورس الحمدلله علي خير بس في مشكلة الكورس لازم يكونلو في نهايته مشروع يتطبق عليه .... ايوة طبعا .... هو الكود ايه شوية اجزاء او حاجات نتعلمها وخلاص .... الكود لازم يتطبق عملي ، ونظرا إلي اننا في رابعة يعني عندنا مشروع تخرج يبقي ايه احسن فكرة D: .... بالظبط كده ان مشروع التخرج يبقي هه نفسه مشروع الكورس .... وهات يا شغل للصبح وتبدأ الرحلة التانية مع "الباشمهندس" ، المهم عشان ماطولش عليكو الحمدلله وصلنا إلي إننا خلاص بنقفل في المشروع ولازم يتسلم عشان اتأخرنا جدا ، تعبت وزهقت واتخنقت وعاوزة اقدمه بقي طيب ايه الحل ما احنا لسة بيطلعلنا " errors " .... يبقي الحل زي ماقلت فوق "الباشمهندس" طيب ماهو النهاردة الخميس وبكرة الجمعة والسنتر بتاع الكورس (مكان المقابلات للمشروع والكورس) هايكون قافل ،، يبقي الحل اني انزل اقابله برة طيب هو هايوافق طيب بابا وماما هايوافقوا ..... طيب وايه المشكلة مانا مش نازلة اتدلع ده انا نازلة عشان المشروع طيب وبعدين افرضي هو مش فاضي ... طيب ماتساليه وتشوفي هايقولك ايه ....(طبعا كل ده كنت انا باكلم نفسي) بس وانا بكلمه وصفتله الوضع اللي احنا فيه لقيت الهموم بتزيد وصوتي بيتخنق وباحس بالازمة اللي احنا فيها اكتر وان الوقت ضيق وان المشروع لسة ماخلصش ومين اللي هايناقشنا وفي حاجات كتير لسة .... لقيته بيقولي متقلقيش ان شاء الله هانلحق نخلص كل حاجة ان شاء الله قبل ميعاد المناقشة وبكرة ياستي انا معنديش مشكلة وشوفي المكان اللي تحبيه او عاوزاه قريب لبيتك انا معنديش مانع ..... اتفقنا علي المكان والزمان ..... طيب باقي ايه ؟ بابا وماما .... بس عشان تبقوا معايا في الصورة انا عندي قدر من الحرية لا يستهان بيه والحمدلله بيثقوا فيا ثقة اكتر من عمياء .... بس نكمل بقي رحت قلت لماما انا نازلة بكرة اقابل الباشمهندس ... بكرة ؟ مش بكرة الجمعة ؟ ايوة ياماما بس عشان اخلص انا تعبت بقي ويرجع صوتي يتخنق تاني وافتكر همومي والمشروع اللي ماخلصش ... تقولي خلاص طيب .... اعتبرت ان ده تصريح مفهوش جدال .... يوم المقابلة : اتصل بيه عشان اعرف معادنا الساعة كام بس كلمته منين ... من "موبايل بابا " اتفقنا وقفلنا وبابا طبعا عارف اني كنت باكلم "الباشمهندس" بس وشوية كتيييير عدوا ... والاقي موبايل بابا بيرن وبابا يرد وينده عليا ويقولي ده "الباشمهندس" .... ارد وانا متنحة ومخضوضة ... الاقيه بيقولي هاناجل نص ساعة بس وقبل ماقفل سمعت بابا بيندهلي .... استني هاتيه انا عاوزه ... اديله الموبايل وانا متنحة اكتر ... الاقيه بيشكرة علي تعبه معانا والمجهود الكبير اللي هو عامله ..... اطمنت شوية .... وبعد ماقفلت قمت عشان البس وقلت لبابا اني نازلة رايحة اقبله عشان كذا وكذا ... وعادي بابا يقولي اوكي ... طبعا مكنش عادي اوي كان في استفسارات كتير وليه انتي وليه مش زميلتك التانية وفين ومتتاخريش وخدي بالك من نفسك وهكذا ....وانزل وارجع وعادي جدا .... ونزلت النهاردة تاني عشان باقي الحاجات بس وانا مروحة فكرت كتييير ...
ليه بانزل؟ ليه نعمل المشروع في الشارع ؟ ليه في مكان مش البيت ما احنا هنا او هنا بنعمل حاجة مهمة ومحددة وليها هدف واضح .... مش بنلعب مش بنهزر مش بنرغي ولا اي حاجة .... ليه ماكنش مثلا بابا او ماما حد فيهم يقولي ماتقترحي عليه يجي واحنا موجودين وتعملو الحاجة هنا بدل الشارع ؟ تفتكروا عشان هو شاب؟ ولا عشان ميصحش؟ طيب ليه مايصحش ماهي هي نفس القعدة علي الاقل نكون في بيت وقدامهم ده غير اننا يعني مش بنحب في بعض ده شغل ، بس هي كانت مجرد فكرة ومش فاهمة ايه الغلط او العيب اللي فيها اللي مخليني انا نفسي ماقدرتش اواجه بابا وماما بيها ، تعرفو انتو ايه اللي فيها؟؟
